راوية انا وحبيبتي

** الجــزء الأولــــ **

في بيت ابو محمد ..
في الطابق العلوي ..
في غرفة ريم ..
ريم نايمة و لا عليها المكيف يشتغل و الغرفة باااااااردة و كأنها ثلج .. امس نايمة متأخر سهرت على التلفزيون مع حسينووه ما وراهم لا شغلة و لا مشغلة ..
دخلت الشغالة على ريم ..
ريم : نـــــعـــــــــــــم شتبين ؟
الشغالة و هي تهز راسها : ماما في قول قومي لطزي اكل
ريم و هي تهز راسها تقلد على الشغالة : ههههه قولي لها ريم مافي اكل ويا راسج كله يهتز و بس
الشغالة : ماما في قول جديه انا ما في شغل
ريم بصراخ : بــــــــره
سمع زايد الصوت و على طول دخل الغرفة ..
زايد : شفيج يا ام لسان تصارخين .. قومي قعدي بسج نوم لا صلاة و لا ديانة
ريم : اوهوووووو يا المغثة اقول شتبي ؟
زايد و هو باقي شوي و يفطس من الضحك على شكل ريم : ههههههههههههههه هههههههه و كل ما سكت رد يضحك
ريم و هي رافعة حاجب : اقول .. يالس في سيرك اخ زايد ؟
زايد : هههههههههههههههههههههههه قومي جوفي شكلج في المنظرة اول هههههههههههههههههههه
ريم قامت من سريرها على المنظرة و صرخت : واااااااااااااااااه
الكل و حتى الشغالة : ههههههههههههههههههههه
ريم : يمه لا مستحيل هاي انا يمه كشتي تخوف
زايد : توج دارية ويه هالكشة قومي يلسي لميها لا اخترع يمه
ريم : عدال يالرقيق
زايد : ويه رقيق و لا اخرع الناس بكشتي .. ههههههه انتي مو بس خرعتي الناس حتى نفسج تخرعتي من نفسج هههههه
ريم للشغالة : هي انتي ييبي لي ربطة و فارجي
الشغالة : ان شاء الله مدام
ريم : مدام اللي توقف راسج عن الهز ان شاء الله انا آنسة سمعتي مب مدام شايفة ريلي وراي زافينه
زايد : اول مرة اجوف وحدة تنتظر ريلها مب ريلها ينتظر متى يجوفها
ريم : والله ماكو حد غريب
زايد : اقول انا اخوج مب اختج
ريم : اوووووه صج نسيت تصدق فكرتك مريم اختي ؟
زايد انصدم : هاه ايا اللي ما تستحين الحين انا بنت ؟
ريم و هي تضحك : ايه توك داري
و نط زايد على السرير و ظل يحك ريم في ريولها و هي تضحك
الشغالة عطت ريم الربطة و مشت و هي تحرطم و تحمد ربها على العقل ...
ريم بنت ابو محمد هي البنت الصغيرة و آخر العنقود عمرها 16 سنة اما زايد فهو عمره 19 سنة .. راح تعرفون شخصياتهم اكثر لما نتخلل اكثر في الاجزاء ...
قام زايد عن اخته بعد ما صار ويهها احمر من كثر الضحك و راح غرفته يسبح اما ريمك فقامت سبحت و تكشخت و نزلت تحت ..
الطابق السفلي في بيت بو محمد في المطبخ ..
كان بو محمد يالس يقرأ في الجريدة و ام محمد تجهز الغدا و تسولف مع مريم بنتها .. مريم متزوجة بس ريلها مسافر و يالسة في بيت ابوها عمرها 25 و عندها ولد عمره 3 سنوات اسمه احمد حبوب و شيطون ..
مريم : يمه وينها مرام ؟
ام محمد : ما ادري و الله .. من يوم ما راح المرحوم و هي كله في غرفتها و ما تطلع منها .. تنهدت ام محمد ..
مريم : بقوم اشوفها ..
ام محمد : قومي حبيبتي ..
راحت مريم صعدت الدري و هي تركب الدري تلاقت مع ريم ..
مريم : يا ام كشة طول الليل ما خليتوني انام ما تعرفون تسهرون في الصالة ساهرين في غرفتج بعد هاه
ريم : بـل بـل يا صباح صبحك كلتيني بثيابي شوي شوي اول شي يقولون صباح الخير
مريم : الصبح ولا الحين احنا الظهر
ريم : جي الساعة كم ؟
مريم : الساعة 2 ننتظر يي محمد و بنتغدى
ريم : يا سلاااااااااام و محد قعدني من النوم
مريم : ابشري بكرة بقعد فوقج علشان تقعدين و لا بتحسين بعد
ريم : بـل خلاص بقفل حجرتي
مريم : شفتي ؟ كشفتج تقولين جي علشان محد يهاوشج ها ؟
ريم : ههههههه
مريم : وين حسينو ؟
ريم : ما ادري عنه
مريم : زين يلا باي
ريم : برد بشوفج تراني
مريم انحرجت و طالعت ريم بنظرة و مشت
ريم : ههههههه
راحت مريم فوق و هي تفكر في مرام ...
وصلت لين غرفة مرام و طقت الباب
مرام : نعم
مريم : انا
مرام : لحظة شوي
مسحت مرام دموعها و عدلت شكلها و قامت فتحت الباب
دخلت مريم غرفة مرام و فتحت الستاير و الدرايش ..
مرام غمضت عيونها لان المها النور لانها كانت قاعدة في الظلام
مرام : اووووه سكري الستارة
مريم : لأ لي متى بتحبسين روحج خبريني و الله قلبنا يتقطع على شوفتج جي ماكو يعني ماكو ما ييتي بالطيب بتيين بالغصب
مرام بصوت عالي : لآلآلآلآلآلآلآلآلآ سكريهم
مريم ما اهتمت الى مرام و راحت سكرت الباب و اخذت مرام و حطتها فوق السرير و يلست جنبها
مرام فتحت عيونها شوي شوي و الدموع طاحت ..
مريم حضنت مرام ..
مريم : شفيج يا اختي لي متى بتظلين جذي ؟ خلاص جاسم راح راح يا مرام
مرام : مستحيل .. مستحيل جاسم ما راح جاسم حبيبي و خطيبي مستحيل يروح اصلا هووعدني ما يتركني طول العمر
مريم : طول العمر و هو عمره خلاص خلص و دامه خلص يعني خلصت كل الوعود اللي فيه
مرام : لأ مستحيل
مريم : ماكو شي مستحيل في هالدنيا ابدا
مرام : ليش بيتركني ؟
مريم : لأن هاي كتبة ربج
مرام و هي تبجي : انا اتصلت له مغلق تلفونه ..
مريم : يا قلبي عليج يا اختي .. حبيبتي انتي قلبج هاوي جاسم بس ما يصير الحي يموت علشان الميت خلاص يا حبيبتي خلاص جاسم راح و ما بيعود
مرام : لأ بيعود الله يحيي و يميت و يميت و يحيي
مريم سكتت
مرام : شفتي سكتي
مريم : يا مرام يا حبيبتي حرام عليج اللي تسوينه بنفسج ليش ؟ هاي جزا امي مسكينة و ابوي ؟ تخلينهم في حزن ليل نهار على حسابج ؟ ليش؟!؟
مرام سكتت
مريم : انا ما بيأس منج و ان شاء الله تردين مثل اول و احسن .. بس اخبرج ان هالشهر شهر ولادتي ..
مرام بلهفة : اذا يبتي ولد سميه جاسم
مريم : ليش اسمي جاسم و جاسم موجود مثل ما تقولين ؟
مرام بجت بقوة : جاسم مو موجود زين ؟ مو موجود آآآآه مو موجود ..
مريم : .............
مرام : مريم وعد سميه جاسم
مريم : الا اكيد بسميه جاسم يا بعد قلبي و قلب جاسم قومي ترحمي عليه و اقراي له قرآن و صلي له و بعدين نزلي تغدي معانا تحت ..
مرام : ان شاء الله ..
طلعت مريم من غرفة مرام و هي كانت متأكدة بأن مرام بتنزل تحت لانها خلاص اقتنعت بعدم وجود جاسم ..
اما في غرفة حسين ..
كان حسين نايم و يشاخر بعد ..
مريم : يه شهالصوت .. ريموو و يلست محمد و قاعد من النوم و زايد مثل الشي و مرام بعد .. هاي اكيد حسينوووه احمد .. احمد
احمد ولد مريم : نعم ماما
مريم بخبث : هجوم على خالو حسين
هجمت مريم مع احمد هجوم عسكري على حسين قام حسين متخرع و على طول رفع يده مستسلم
حسين : استسلام انا مستسلم انا مستسلم
مريم : ههههههههههههههههههههههههههههههههههه
حسين : اوريج تخرعيني انتي و ولدج هالنتفة
حملت مريم ولدها و شالت عليه
قام حسين من نومه و ركض وراها
نزلت مريم تحت و انخشت ورا امها هي و ولدها
ام محمد : صج ميانين مرة شكبرج عندج ولد و بعد جذي عيل ما الوم زيود و ريوم
ابو محمد ناظر عياله و ضحك : هههههههه
راح حسين لمريم يلاحقها و هي تركض و كان ولدها يلعب بالعابه و هي تركض تعرقلت فيهم و طاحت و صادها حسين و مسكها من ايدها و وداها المطبخ اخذ الحليب و شربها اياه
و هي تصارخ ..
مريم : وااااااااااااااااااع
حسين : ما عليه انا تخرعيني هاه
احمد : ماما ماما
حسين : انت شغلك بعدين مب الحين ماما ماما هاه
و ابو محمد ميت من الضحك عليهم
مريم حامل و ما تشتهي شي اسمه حليب ...
مريم : يممممممممممه
ام محمد خايفة على بنتها بس بعد تضحك
نزلت مرام و ماتت من الضحك على الموقف
ترك حسين مريم و على طول اخذ ولدها قبل ما تشرد فيه
حسين : تعال تعال يا روح امك انت تحب العسل ؟
احمد ببراءة : اي بس ما احب القيمر
حسين بخبث : اهاااااااااااا
و اخذ حسين القيمر و حط منه شوي في الصحن و اخذ الخبز و ظل يلقم احمد و اذا ما رضى ياكل ينظره بغضب فيخاف و ياكل تركه حسين و قام عنه هو و امه و هو يضحك
بس مشى حسين قامت مريم و ولدها يرجعون
مات حسين من الضحك على اخته و ولدها و مشى عنهم راح فوق يسبح و تكشخ و نزل ....
وصل محمد و يلسوا الاهل يتغدون ...
محمد الشاب الكبير من بيت بو محمد عمره 26 محامي .. اما حسين فهو عمره 17 سنة طالب في الثاني ثنوي و ريم في الاول ثنوي اثنينهم كله يسهرون مع بعض .... هذا جزء بسيط من قصتي و يوضح لنا اول عائلة راح نعيش معاها في القصة ..
تحياتي ... !!

عاشقة الاحزان

يـــــــــــــسلمووو
يعطيك العاافية

تســلمين يالغلااا على القصة الرووعة ..وناطرين البــارتــ الجديد

يسلموو ع المرور

ويلا اليحن راح انزل البارت الثاني

** الجــــــــــــزء الــثـــانـــي **

في البيت المجابل الى بيت ابو محمد اللي هو بيت ابو حسن اخو ابو محمد ..
ابو حسن ريال كبير عمره 55 سنة اكبر من اخوه ابو محمد بـ 5 سنوات .. ريال طيب و حنون و هادي عكس اخوه بو محمد .. بو محمد انسان طيب بس عصبي و ما يفكر في الامور وايد قبل ما يتخذها مثل بو حسن ...
فوق في غرفة علي ..
علي شاب طويل و عريض الكتفين .. وسيم وايد .. طيب و حنون و هادي .. بس في مثل الوقت وايد مرح و حبوب .. و مغازلجي للأسف .. !!عمره 19 سنة رفيج زايد الروح بالروح .. و الاثنين تقريبا فوتو كوبي من بعضهم البعض
كان علي يالس على النت على الجات و يلقط اي بنت يشوفها ..
كان داخل باسم ادور على حب .. كانت داخلة بنت باسم (( ابي قلب يحبني ))
هو استانس عاد ذاك الوقت و على طول اتجه لها على الخاص
دخل عليها علي ...
ادور على حب : سلاموون عليكوم
ابي قلب يحبني : و عليكوم السلام
ادور على حب :بنت او ولد ؟
ابي قلب يحبني : بنت
ادور على حب : هلا و الله .. شحالج
ابي قلب يحبني : تماموو و انت بنت او ولد ؟
ادور على حب : ولد
ابي قلب يحبني :: اهااا هلا فيك شحالك ؟ عساك بخير ؟
ادور على حب : و الله تمام و بصحة و عافية
ابي قلب يحبني :دوم
ادور على حب : تسلمين .. ابي قلب يحبني ؟
ابي قلب يحني : نعم
ادور على حب : ممكن اسالج سؤال ؟
ابي قلب يحبني : ممكن
ادور على حب : انتي تبين قلب يحبج و انا ابي حب يعني انا ابي حب و انتي تبين حب ما تحسينها صدفة حلوة ؟
ادور قلب يحبني : ايه تصدق
ادور على حب : زين هذا ايميلي ضيفيني …….@HOTMAIL.COM
ابي قلب يحبني : بس انا ابي قلب يحبني مب انسان يضيفني
ادور على حب : افاااا و الله فهمتيني غلط انا قصدي شريف يعني اتعرف عليج اعرف اطباعج تعرفين اطباعي بعدين نتزوج
ابي قلب يحبني : اهاا زين و اذا ما عيبتك و الا انت ما عيبتني ؟
ادور على حب : كل واحد في سبيله
ابي قلب يحبني : حلوووو .. اوكي بضيفك
ادور على حب : اوكي في انتظارج .. اقول حبي
ابي قلب يحبني : هلا قلبي
ادور على حب : انا الحين بقوم و على الساعة 8 ان شاء الله بقعد على المسن و بستقبل اضافتج كوني يالسة اوكو على اساس نتعرف على بعض ؟
ابي قلب يحبني : على عيني و على راسي يا بعد عيني و راسي و قلبي
ادور على حب : اوكووو بباي
ابي قلبي يحبني : باي عمري
علي قام و هو يضحك و يصارخ : ايوااااااااااااااااااا ايواااااااااااااااا و حصلناها و حصلناها ايوااااااااااااااااااااا ههههههههههه كللللللوووووووووووووووووش
سمعت زينب الصوت و على طول يت غرفة علي
زينب شدخت بالباب و دخلت : شصاير شفيك منو عرس منو مات ؟!؟!؟!؟!؟!
علي طالعها باستغراب : شنو ؟
زينب : منو عرس ؟ منو مات ؟!!!!!!!!!؟؟؟
علي استوعب السالفة و قعد يضحك : هههههههههههههههههه ريلج عرس عليج و من مات ولدج مات دعمته سيارة
زينب اغمي عليها على طول ........
علي ما استوعب السالفة اول شي بعدين على طول اخذ غرشة العطر و راح يشمم زينب علشان توعى و هو يضحك
وعت زينب و قامت وقفت بمساندة علي ..
زينب : صج عرس علي ؟
علي نقع من الضحك : ههههههههههههههههههههه ما سألت عن ولدها سألت عن ريلها اقول يالخبلة انا اسولف عليج
زينب ضربت علي على صدره و مشت عنه و هي تروح و تيي يمين و يسار كأنها سكرانة من الموقف اللي صار لها
و اما علي فراح غرفته و انسدح على السرير و نقع من الضحك ..
كان حسن مار صوب غرفة علي و سمع ضحكه طق الباب ..
علي : نعم
حسن : انا حسن
علي : ادخل الباب مفتوح
دخل حسن غرفة علي و اختنق من ريحة الدخان و العفسة اللي صايرة
حسن : عنبوك شهالعفسة هاي
راح جنب طاولة الكمبيوتر شاف الجقاير مالي العلبة و ثلاث علب جقاير مخلصة و انصدم من هالعدد كله في يوم ؟!؟ ... راح جنب الكاميدينو جاف قلاص ماي و جيق ماي عاد اهو ماي لونه شنو لونه بني من كثر الالوان المائية اللي بدل ما ييب له قلاص تلوين يايب له قلاص اللي يشرب فيه ماي و السرير معرض هدوم و الكبت عفسته عفسة و الكتب منثرة فوق المكتب و الارض كلها هدوم و احزمة .. حسن من النوع اللي يتكره من كل شي طلع بره الغرفة و وقف على الباب
علي : شفيك يالس تتفحص غرفتي بعدين طلعت
حسن : يا اخي غرفتك تلوع الجبد بصراحة
علي و هو يضحك : هههههههه ادري
حسن : زين ناد الخادمة تيي تنظفها
علي : I m sorry I cant
حسن : و شله يعني ما تقدر
علي : بيكوز انا ما ابي اي نفر يدخل غرفتي
حسن : وشله يعني فيها الكنوز ؟
علي : يـــــــــس شوووور
حسن : اقول ترا ابوك و امك عرب
علي : ادري قديمة
حسن : هاهاها خفيـــــــــف
علي : لأ لأ قصدك ريشة
حسن : شرايك تطيرها ؟ و تطير بعد هالعفسة و هالوصخ من غرفتك ؟
علي : ههههههه ان شاء الله اخ حسن اوامر ثانية ؟
حسن : قوم نظف غرفتك و الا ناد الخادمة تنظفها يا ويلك من امي ان يات و شافت الغرفة جذي تراهي معصبة عليك و تقول بعد شوي بتيي لك
علي : صج ؟!؟ بيـــــــه الحين ان يات ما بتسكت لين باجر و هي معصبة علي و تهدر
حسن : هههههههه عقلك في راسك تعرف خلاصك قوم و خلص نفسك ببااااااااي و هو يلوح بأيده
علي : حسن حسووووووون تعال ساعدني
حسن : I m sorry I cant
علي : ايا الخوان
حسن : هههههههههههههههههههه
راح حسن غرفته علشان يسبح و يطلع مع ربعه
حسن الولد البجر الى ابو حسن عمره 23 سنة شاب مثل الشباب عادي طيب و مزاجي وايد بس الشي الكريه فيه انه وايد يتكره من اي شي ..
اما تحت في الصالة ..
كانت ملك و ملاك يالسين يطالعون التلفزيون ..
ملك : شرايج نروح للريم ؟
ملاك : ما ادري ملل ما كأننا في الاجازة و لا يطلعونا هالأخوان
ملك : اي و الله .. امممم قومي بدلي خل نروح لها و انا بروح اخبر ماماتي
ملاك : اوكوو
قامت ملاك و راحت غرفتها طلعت لها بنطلون جينز ازرق فاتح و قميص طويل بدون اكمام لين فوق الركبة بشوي من تحت صاير مايل و لونه ماروني و من فوق لبست جاكيت قصير لحد الصدر بس و لبست شيلة مارونية من النوع اللي ينتفخ لما تلبسينه ..
اما ملك فراحت الى امها تخبرها ..
ملك : يمه بنروح بيت عمي ابو محمد للريم اوكو؟
ام حسن : زين بس الحين الساعة 5 يعني على الساعة 7 او 6 و نص انتو هني انزين ؟
ملك : يمه احنا رايحين بيت عمي خلينا نيلس على راحتنا
ام حسن : اففف انزين كيفج بس حدج الساعة 9
ملك : ان شاء الله يمه
ركبت ملك فوق و هي تتأفف في بالها (( اففف حتى بيت عمنا ما يصير نتأخر فيه )) راحت فوق غرفتها و سبحت و طلعت لها بنطلون بيج وسيع و بدي بني تحته فانيلة بيج البدي لين فوق الركبة بوايد و لبست شيلة بنية ...
نزلت ملاك و ما شافت ملك و راحت ركبت لها فوق ..
ملاك و هي تطق الباب على غرفة ملك : يلااااا نبي نروح
ملك من ورا ملاك : يالخبلة تطقين الباب على من ؟
ملاك تخرعت : ويه يمه من وين طلعتي انتي ؟
ملك : ههههههه من غرفتي بعد من وين
ملاك : اففف زين يلا امشي خل نروح
ملك : يلا ..
لبست ملاك عباتها وملك بعد و طلعوا بيت عمهم بو محمد المجابل بيتهم ..
وصلت ملك و ملاك بيت عمهم و طقوا الجرس ..
طلعت الخادمة لهم ..
ملك : هني ريم ؟
الخادمة : ايه ادخلي <<< ما الومها تراهي ما تعرف توجب حد
دخلوا ملك و ملاك بيت عمهم و ركبوا فوق على طول الى الريم ..
طقت ملاك الباب ..
ريم : افففففففف اللهم طولج يا روووح و الله ذابت جبدي منك يا زيوووود لو تموت ما بتحصل الرقم ..
نقعت ملاك و ملك من الضحك على ريم
ريم سمعت ضحك بنات و استغربت : جنه الا صوت ملوك وملاكوو
طلعت بره و الا ثنتينهم ميتين من الضحك عليها
ريم : ههههههههههههههه هذا انتو و انا افكركم زيووود تراه مينني
ملك : الله يغربل بليسج هههههههههههه ما تيوزين عن سوالفج
ريم : هههههههههههههه
ملاك بعدهي تضحك : ههههههههههههههههههههههههههههههه
كان زايد طالع من غرفته و شاف ملاك وملك و ريم واقفات راح لهم و جاف ملاك تضحك ..
زايد بنظراته اللي تستحي البنت منها : شفيج تضحكين
ملاك من جافت نظراته على طول سكتت و ابتسمت له : ماكو شي ما اضحك على شي و على طول طالعت ريم
ريم : ههههههههههههههههههه
زايد و هو رافع حاجب : يــــــه
ملك لزايد : يعني لازم تعرف
زايد : اوووهوووووو ايه لازم اعرف عندج مانع ؟
ملك : لا عندي دواس
زايد ابتسم : ما تنكتين
ملك و هي مبتسمة : و انت ما تقتل من الضحك
زايد : ادري تراني مب قاتل
ملك : هاهاهاهاهاها ما تضحك
زايد : و من قال اني ابي اضحكج ؟
ملك : ويييييي مالت زين ؟
زايد : لأ مو زين
ملك : اوووفففف ريموو امشي خل ندخل داخل احسن عن هالويه
زايد بتكبر : تتحدين هالويه انتي
ملك : ويييييييييييه ايه اتحداه
زايد في داخله (( اي و الله تتحدينه )) : من حلات هالويه اللي عليج
ملك : ما عليه الله خالقني جذي
زايد : أستغفر الله ربي
ملك : ههههههههههه شفت انك غلطان
زايد بنظرة : هههههههههااااااااي مصدقة روحج وايد
ملاك : اففففففففف و انتو دوم هواش ؟
زايد و هو يطالع ملاك بذيج النظرة : ايه عايبنا هالشي
ملاك و هي عافسة ويهها : اوكي على راحتكم ظلوا هني تهاوشوا و احنا بندخل داخل
و دزت ملاك الريم داخل و سكرت الباب و تركت ملك و زايد بروحهم ..
ملك بنظرة لزايد : وي انا بدخل احسن لي من مجابل هالويه
زايد : وع و انا اللي ابي اجابل ويهج عادة من حلات ويهج بعد لو ملاك قلنا ما عليه الا انتي
ملاك سمعت زايد و صار ويهها احمر حده و قام يتلون
الريم : اييييييييييه ما نقدر ما نقدر على الحب احنا بعد عيني عينك يمدحها
ملاك : ههههههههه ولي يالسبالة
الريم : ايه معلوم انا سبالة انا الريم مب زايد
ملاك اخذت المخدة و حذفتها على الريم ..
زايد مشى عن ملك و هو يفكر ملاك في باله (( شكلها زعلت مني ما عليه بعدين ادز لها مسج و ترضى فديتها و الله و قام يغني )) طلع و ركب سيارته و توجه للمول علشان يتلاقى مع علي هناك ..
اما الريم و ملك و ملاك يلسوا يطالعون التلفزيون و يسولفون ...
اما بعيد عن هالمنطقة كلها ..
كان في واحد طالع حيران .. ضايع .. اسمه جاســـم ..
جاسم كان يسوق السيارة و في باله عدة تساؤلات .. (( يااااااااه يا ترى شلون كان شكل امي و ابوي و اخواني و اخواتي و اعمامي و عماتي و اهلي كلهم .. يا ترى منو ربعي كانوا ؟ اووووووووووف و الله حالة .. عايش ضايع مالي والي .. مالي غير هالبيت و هالسيارة و هالفلوس و هالمزارع و هالشركة و هالاشياء اللي مالها معنى في الوجود .. يااااااااااااه يا ترى من انا ؟ شهي شخصيتي ؟ اففف يلا يا ... شنو اسمي ؟ ايه صح جاسم آآآآآآآآآآآآآآآآآه .. كان يمشي حيران ما يدري يتجه وين .. ما عنده ربع ما عنده اهل .. جاسم سوا حادث في يوم من الايام مع اهله و ماتوا اهله كاملهم و بس هو اللي بقى منهم صاده فقدان ذاكرة فما يعرف اي شي .. عن حياته عن اهله عن اي احد .. اعمامه عماته اولادهم ما يدري وينهم ما يدري من هم .. كل همه يحصل حد يلاقيه و يستريح عنده .. كان يمشي في السيارة و كأنه طفل صغير توه يتعلم وين يروح و وين يي .. كان يمشي و شاف البحر عن قريب .. شده له .. حس بشي يتحرك في داخله .. على طول بركن السيارة على السيف و نزل .. راح قعد على صخرة كانت تواجه البحر بحيث تكون الريول في البحر و تلعب بها الموج .. و الجسم كله بره ما عدا القدم .. كانت الامواج تتلاطم في ريوله .. يتأمل البحر شلون حاوي المااااااااااااي هذا كله معقولة يا سبحان الله .. يتأمل شلون هالبقعة ما تطيح من كثر هالماي اللي فيها شلون منحصر الماي فيها و ما تمصه الارض لهالدرجة عميق هالبحر .. قعد يتأمل البحر و السماء و الطيور .. لين ما يت الساعة 6 و كانت بتغرب الشمس .. احمرت السما و صار لون البحر برتقالي على احمر و كانت الطيور ترفرف فوق البحر ابتسم على هالمنظر العجيب و حس براحة كبيرة في داخله سمع صوت الأذان .. الله اكبر الله اكبر .. الله اكبر الله اكبر .. قام و ترك عنه التأمل خذ علبه الكلينكس و جفف ريوله و قط الكلينكس في الحاوية و ركب سيارته و اتجه الى المسيد .. يلس يصلي و يقرأ قرآن و يبجي .. طلع من الميلس و ركب سيارته و راح بيته و هو كل تفكيره في من هو .. سبح و نام و ما دخل حلجه اي لقمة اكل ...
اما في بيت بو محمد
في الطابق العلوي ..
كان صوت الضحك عالي وايد .. بس للأسف كان الحزن موجود بعد ..
في غرفة مرام ..
كانت مرام منسدحة و شعرها متناثر على المخدة و المخدة تبللت من كثر الدموع و هي تفكر بجاسم في بالها .. (( معقولة يا جاسم رحت عني .. رحت .. آآآآآآآآآه .. وينك عني وينك ..انت ليش خنت الوعد و رحت .. بس انت وافي و الوفا دوم كان فيك .. اما مب مصدقة انك رحت و خنتني .. مب مصدقة انك رحت و توسدت القبر و خليتني انا وحيدة .. انا مب مصدقة يا جاسم مب مصدقة ..
قامت وقفت و راحت صوب المكتب .. أخذت دفترها اللي غلافه فرو لونه أحمر .. و مرسوم عليه قلب أحمر متلحف بقلب ثاني أحمر .. اهداه لها جاسم في عيد ميلادها الـ 15 مع قلم بعد ملتف عليه الفرو و من فوق فيه خيوط معلقة نهايتها قلوب صغيرة حمرة مع وردة حمرة و شمعة حمرة مع بطاقة حلوة مكتوب فيها .. هذا الدفتر ابيج تكتبين كل شي تهدينه لي اي احساس تحسين به في هاي الدفتر بهاي القلم مب بغيرهم و هالشمعة ضويها علشان تشوفين لما تكتبين و هالوردة شميها و انتي تكتبين علشان اكون انا حولج و داخلج و في حروفج متلحف قلبي بقلبج و قلبي ذايب بحبج .. حبيبج جاسم ..
جافت الدفتر و بجت أكثر و جافت الوردة اللي ذبلت و ماتت و صارت جافة مثل حبهم اللي صار جاف اللي خلاص من بعد ما مات جاسم صار هالحب و لا شي من بعد ما كان اجمل و اروع حب .. بجت مرام و بجت و بجت .. اخذت القلم و كتبت هالخاطرة البسيطة اللي تعبر عن اقل حزن تحس فيه مرام ...
بقايا ذكريات الليل الدامس
أحبك ..
أشتاق لعودتك ..
لقد أسرتني بحبك و عشقك ..
فياليتك تعلم كم أتألم لفراق عينيك الحلوتين ..
عينيك اللتان أرى أختزانهما كل الاحساس و الشوق لي
يا ليت تلك الأيام تعود ..
ليت ذلك الجو يعود ..
الغيوم و القمر المختبيء خلف الغيوم ..
كنا نراقبه كيف يمشي بسرعة بين و خلف الغيوم ..
و كأنه مستح ٍ منا نحن الأثنان ..
نحن الأثنان و لست أنا وحدي كما هو الحال الآن ..
ذهبت لذلك المكان ..
فمن الممكن أن يعود ذلك المكان بذكرياته ..
تلك الذكرى الجميلة ..
فلم أرى شيئاً ..
رأيت الشجرة التي جلسنا أسفلها .. و هي حزينة كسيرة ..
جفت جذورها و يبست أوراقها و ماتت سيقانها ..
معلنة عن حزنها و ألمها ..
و الغيوم متبلدة .. تعلن هن سقوط الدموع من عينيها ..
دموعها الممطرة ..
و كأنها تنوح بلونها و سوف تبكي بمطرها ..
و الجو مظلم .. مخيف .. مرعب .. !!
و كأن تلك المزرعة التي كلها أشجار .. تحولت الى صحراء قاحلة مظلمة ..
فعلمت في ذلك الحين .. أنك رحلت ..
رحلت حقا مثلما قال أهلي و قالت عشيرتي ..
نعم .. رحلت .. رحلت و لن تعود ..
و لم يبقى منك .. سوى بقايا ذكريات الليل الدامس ..
فقط .. تلك الذكرى الحزينة .. المؤلمة ..
و لم يبقى لي سوى تلك الدمعة المخيفة ..
سكرت الدفتر و مسحت دموعها بعد ما كتبت و ريحت شوي قلبها و قامت طلعت لها ملابس علشان تسبح و تنام .. على أمل ان أعصابها ترتاح شوي من بعد كل هالتعب ... !!!

أتمنى أن هالجزء يكون أحلى من حيث المعنى و الأحداث و الكلمات ... و يكون افضل و أكيد أطول من الجزء الأول .. و تحياتي لكم ..